Türkmenistanyň sud edaralarynda kadrlar işini kämilleşdirmek hakynda

TÜRKMENISTANYŇ PREZIDENTINIŇ

P E R M A N Y

Türkmenistanyň sud edaralarynda kadrlar işini kämilleşdirmek hakynda

(Türkmenistanyň Prezidentiniň aktlarynyň we Türkmenistanyň Hökümetiniň kararlarynyň ýygyndysy, 1997 ý., № 8, 5880-nji madda)

(Türkmenistanyň Prezidentiniň 22.01.1998 ý. çykaran № PP-3525 we 10.11.2003 ý. çykaran № PP-3954 Permanlary esasynda girizilen üýtgetmeler we goşmaçalar bilen)

Türkmenistanyň sud edaralarynda kadrlar işini hil taýdan gowulandyrmak we işgärleri seçip almakda hem-de ýerli-ýerinde goýmakda sudlaryň ýolbaşçylarynyň jogapkärçiligini güýçlendirmek maksady bilen, karar edýärin:

1. Türkmenistanyň Ýokary kazyýetiniň, welaýat, Aşgabat şäher, etrap we şäher kazyýetleriniň sudýalygyna kandidatlary seçip almagy we taýýarlamagy Türkmenistanyň Ýokary kazyýetiniň üstüne ýüklemeli.

2. Welaýat, Aşgabat şäher, etrap we şäher kazyýetleriniň kazylary Türkmenistanyň Ýokary kazyýetiniň başlygynyň hödürlemegi boýunça Türkmenistanyň Prezidenti tarapyndan wezipä bellenilýär diýip bellemeli.

3. Etrap, şäher kazyýetleriniň administratiw we ýerine ýetirijilik iş ýörediş baradaky sudýalygyna kandidatlary seçip almak hem-de taýýarlamak, şeýle hem olary wezipä bellemäge hödürlemek şu Permanyň 1 we 2 madda laryna laýyklykda amala aşyrylýar.

4. Kazyýetleriň maddy-tehniki üpjünçiligi we olaryň işlemegi üçin geregiçe şertleriň döredilmegi baradaky işi guramagy Türkmenistanyň Ýokary kazyýetiniň üstüne ýüklemeli.

5. Türkmenistanyň Ykdysadyýet we maliýe ministrligi sud edaralaryny maliýeleşdirmegiň hem-de maddy-tehniki taýdan üpjün etmegiň tertibi hakyndaky teklipleri on gün möhletde taýýarlamalydyr we Türkmenistanyň Ministrler Kabinetine girizmelidir.

6. Türkmenistanyň Ýokary kazyýeti, Türkmenistanyň Ýustisiýa ministrligi şu Permandan gelip çykýan üýtgetmeleri we goşmaçalary ulanylýan kanunlara girizmek hakyndaky teklipleri on gün möhletde taýýarlamalydyr hem-de Türkmenistanyň Ministrler Kabinetine girizmelidir.

Türkmenistanyň Prezidenti Saparmyrat Türkmenbaşy

Aşgabat şäheri

1997-nji ýylyň 21-nji awgusty

№ PP-2358