Türkmenistanyň Ýaşulularynyň maslahatyny çagyrmak hakynda

TÜRKMENISTANYŇ PREZIDENTINIŇ

P E R M A N Y

Türkmenistanyň Ýaşulularynyň maslahatyny çagyrmak hakynda

(Türkmenistanyň Prezidentiniň namalarynyň we Türkmenistanyň Hökümetiniň çözgütleriniň ýygyndysy 2009 ý., № 1, 61-nji madda)

Biziň ata-babalarymyzdan miras galan däp-dessurlarymyzy hemişe goldanyp gelýän halkymyz ýaşululara uly sarpa goýmak, olaryň abraý-mertebesini belende götermek ýaly iň asylly däplere eýerýär. Ýaşulularyň türkmen jemgyýetindäki mynasyp ornuny, ýaş nesillerimizi asyllylyk, halallyk, watansöýüjilik, zähmetsöýerlik ruhunda terbiýelemekdäki aýratyn hyzmatlaryny şöhratly taryhymyzda, milli mirasymyzda we şu günki durmuşymyzda anyk duýýarys.

Ýurdumyzyň jemgyýetçilik durmuşyna ýaşululary işjeň çekmek, halkymyzyň agzybirligini pugtalandyrmakda we il-ýurt bähbitli meseleleri pähim-parasatly, maslahatlaşyp çözmekde olaryň örän baý tejribesini, asylly ýörelgelerini netijeli peýdalanmak maksady bilen, karar edýärin:

1. Türkmenistanyň Ýaşulularynyň maslahatyny 2009-njy ýylyň mart aýynda Lebap welaýatynyň Türkmenabat şäherinde çagyrmaly.

2. Türkmenistanyň Ýaşulularynyň maslahatynyň gün tertibine döwlet durmuşynyň ilkinji nobatdaky meselelerini hödürlemeli.

3. Türkmenistanyň Ýaşulularynyň maslahatyny guramaçylykly geçirmek we gelýän teklipleri, ýüztutmalary kabul etmek, toplamak hem-de seljermek üçin Döwlet toparyny döretmeli (düzümi goşulýar).

4. Şu Permanyň ýerine ýetirilişine Türkmenistanyň Mejlisiniň Başlygy, Türkmenistanyň Ministrler Kabinetiniň Başlygynyň Orunbasarlary, Türkmenistanyň Prezidentiniň Diwanynyň Iş dolandyryjysy, welaýatlaryň we Aşgabat şäheriniň häkimleri gözegçilik etmeli.

Türkmenistanyň Prezidenti

Gurbanguly Berdimuhamedow

Aşgabat ş.,

2009 ý. ýanwar aýynyň 31-i

№ PP-5288

Türkmenistanyň Prezidentiniň

2009-njy ýylyň 31-nji ýanwarynda

çykaran PP-5286 Permanyna

goşundy

Türkmenistanyň Ýaşulularynyň maslahatyny guramaçylykly

geçirmek we gelýän teklipleri, ýüztutmalary kabul etmek, toplamak

hem-de seljermek üçin döredilen Döwlet toparynyň

DÜZÜMI

Toparyň Başlygy

Türkmenistanyň Prezidenti Gurbanguly Berdimuhamedow

Toparyň Başlygynyň orunbasary

Türkmenistanyň Ministrler Kabinetiniň Başlygynyň Orunbasary

M. Akmämmedow

Toparyň agzalary

Türkmenistanyň Mejlisiniň Başlygy

Türkmenistanyň Ministrler Kabinetiniň Başlygynyň Orunbasarlary

Türkmenistanyň Prezidentiniň Diwanynyň Iș Dolandyryjysy

Türkmenistanyň Prezidentiniň kömekçisi

Türkmenistanyň Goranmak ministri

Türkmenistanyň Adalat ministri

Türkmenistanyň Ýokary kazyýetiniň başlygy

Türkmenistanyň Baş prokurory

Türkmenistanyň Içeri işler ministri

Türkmenistanyň Milli howpsuzlyk ministri

Türkmenistanyň Prezidentiniň ýanyndaky Döwlet we hukuk institutynyň direktory

Türkmenistanyň Prezidentiniň ýanyndaky Demokratiýa we adam hukuklary baradaky Türkmen milli institutynyň direktory

Türkmenistanyň Demokratik partiýasynyň Syýasy Geňeşiniň birinji sekretary

Türkmenistanyň Kärdeşler arkalaşyklarynyň Milli merkeziniň başlygy, Türkmenistanyň Gahrymany Gurbansoltan eje adyndaky zenanlar birleşiginiň Merkezi geňeşiniň başlygy

Türkmenistanyň Uruş weteranlarynyň Türkmenistanyň Gahrymany Atamyrat Nyýazow adyndaky guramasynyň Merkezi Geňeşiniň başlygy

Türkmenistanyň Magtymguly adyndaky Ýaşlar guramasynyň Merkezi geňeşiniň bașlygy

Welaýatlaryň we Aşgabat șäheriniň häkimleri