Türkmenistanyň Prezidentiniň ýanynda Hukuk goraýjy edaralaryň işiniň meseleleri boýunça raýatlaryň ýüztutmalaryna garamak baradaky döwlet toparyny döretmek hakynda

TÜRKMENISTANYŇ PREZIDENTINIŇ

P E R M A N Y

Türkmenistanyň Prezidentiniň ýanynda Hukuk goraýjy

edaralaryň işiniň meseleleri boýunça raýatlaryň ýüztutmalaryna

garamak baradaky döwlet toparyny döretmek hakynda

(Türkmenistanyň Prezidentiniň namalarynyň we Türkmenistanyň Hökümetiniň çözgütleriniň ýygyndysy, 2007 ý., № 2, 36-njy madda)

Türkmenistanyň döwlet we jemgyýetçilik işinde demokratik esaslary mundan beýläk-de ösdürmek, şahsyýetiň Türkmenistanyň Konstitusiýasynda beýan edilen hukuklaryny we azatlyklaryny goramagy üpjün etmek, raýatlaryň hukuk goraýjy edaralaryň işiniň meseleleri boýunça ýüztutmalaryna garamagyň tertibini kämilleşdirmek maksady bilen, karar edýärin:

1. Türkmenistanyň Prezidentiniň ýanynda Hukuk goraýjy edaralaryň işiniň meseleleri boýunça raýatlaryň ýüztutmalaryna garamak baradaky döwlet toparyny döretmeli.

2. Türkmenistanyň Prezidentiniň ýanyndaky Hukuk goraýjy edaralaryň işiniň meseleleri boýunça raýatlaryň ýüztutmalaryna garamak baradaky döwlet toparynyň işiniň tertibi hakyndaky Düzgünnamany tassyklamaly (goşulýar).

3. Türkmenistanyň Prezidentiniň Diwanynyň Hukuk goraýjy we harby edaralaryň işini seljeriş bölüminiň 15 işgäri bolmaly.

4. Türkmenistanyň Prezidentiniň Diwanynyň Hukuk goraýjy we harby edaralaryň işini seljeriş bölüminiň Türkmenistanyň Prezidentiniň 2005-nji ýylyň 18-nji awgustynda çykaran 7457-nji karary bilen tassyklanylan wezipe sanyna üýtgetme girizip, «Esasy hünärmenler» sütüninde «8» sany «12» san bilen çalşyrmaly.

Türkmenistanyň Prezidenti

Gurbanguly Berdimuhammedow

Aşgabat ş.

2007-nji ýylyň 19-njy fewraly

№ PP-4619

Türkmenistanyň Prezidentiniň

2007-nji ýylyň 19-njy fewralynda

çykaran PP-4619-njy Permany bilen

tassyklanyldy

Türkmenistanyň Prezidentiniň ýanyndaky Hukuk goraýjy

edaralaryň işiniň meseleleri boýunça raýatlaryň ýüztutmalaryna

garamak baradaky döwlet toparynyň işiniň tertibi hakynda

DÜZGÜNNAMA

(Türkmenistanyň Prezidentiniň 01.04.2020 ý. çykaran № PP-672 Permany esasynda

girizilen üýtgetmeler bilen)

1. Şu Düzgünnama Türkmenistanyň Prezidentiniň ýanyndaky Hukuk goraýjy edaralaryň işiniň meseleleri boýunça raýatlaryň ýüztutmalaryna garamak baradaky döwlet toparynyň (mundan beýläk - Topar) işiniň tertibini we esasy ugurlaryny düzgünleşdirýär.

2. Hukuk goraýjy edaralaryň işiniň meseleleri boýunça raýatlaryň ýüztutmalaryny hasaba almak we olara wagtynda garamak, şeýle hem olary seljermek Toparyň esasy wezipesi bolup durýar.

3. Topar öz işinde Türkmenistanyň Konstitusiýasyny, Türkmenistanyň kanunlaryny, Türkmenistanyň Prezidentiniň namalaryny, Türkmenistanyň Ministrler Kabinetiniň çözgütlerini, Türkmenistanyň halkara şertnamalaryny, şu Düzgünnamany hem-de beýleki kadalaşdyryjy hukuk namalaryny goldanýar.

4. Toparyň düzümine:

Türkmenistanyň Prezidenti (Toparyň başlygy);

Türkmenistanyň Ýokary kazyýetiniň başlygy (Toparyň başlygynyň orunbasary);

Türkmenistanyň Prezidentiniň Diwanynyň Hukuk goraýjy we harby edaralaryň işini seljeriş bölüminiň müdiri (Toparyň kätibi);

Türkmenistanyň Içeri işler ministri;

Türkmenistanyň Baş prokurory;

Türkmenistanyň Adalat ministri;

Türkmenistanyň Prezidentiniň Howpsuzlyk gullugynyň başlygy;

Türkmenistanyň Mejlisiniň Adam hukuklaryny we azatlyklaryny goramak baradaky komitetiniň başlygy;

Türkmenistanyň Mejlisiniň Adam hukuklaryny we azatlyklaryny goramak baradaky komitetiniň agzasy;

Türkmenistanyň Demokratik partiýasynyň başlygy;

Türkmenistanyň Magtymguly adyndaky Ýaşlar guramasynyň Merkezi geňeşiniň başlygy;

Türkmenistanyň Zenanlar birleşiginiň Merkezi Geňeşiniň başlygy;

Türkmenistanyň Kärdeşler arkalaşyklarynyň Milli merkeziniň başlygy girýär.

5. Topar öz işini hemişelik esasda alyp barýar, onuň mejlisleri zerurlyga göra, ýöne azyndan çärýekde bir gezek geçirilýär. Çözgütler sesleriň ýönekeý köplügi bilen kabul edilýär hem-de teswirnama arkaly resmileşdirilýär.

6. Toparyň mejlisleriniň aralygynda ýüztutmalary kabul etmek hem-de hasaba almak, şolar barada goşmaça maglumat toplamak we beýleki meseleler boýunça gündelik işi Türkmenistanyň Prezidentiniň Diwanynyň Hukuk goraýjy we harby edaralaryň işini seljeriş bölümi öz ygtyýarlarynyň çäklerinde amala aşyrýar.

7. Hukuk goraýjy edaralaryň işiniň meseleleri boýunça raýatlaryň ýüztutmalaryna Türkmenistanyň Prezidentiniň Diwanynyň Hukuk goraýjy we harby edaralaryň işini seljeriş bölümi öz ygtyýarlarynyň çäklerinde Türkmenistanyň kanunçylygynda bellenilen möhletlerde garaýar.

8. Türkmenistanyň Prezidentiniň Hukuk goraýjy we harby edaralaryň işini seljeriş bölümi raýatlardan gelip gowşan ýüztutmalar we olara garamak boýunça edilen iş hakynda Toparyň hasabatyny taýýarlaýar.