Aşgabat şäherinde gurlan Olimpiýa suw-sport toplumyna "Türkmenbaşynyň Olimpiýa suw-sport toplumy" adyny dakmak hakynda

TÜRKMENISTANYŇ MEJLISINIŇ

K A R A R Y

XV-1

XXIII-2

Aşgabat şäherinde gurlan Olimpiýa suw-sport toplumyna "Türkmenbaşynyň Olimpiýa suw-sport toplumy" adyny dakmak hakynda

(Türkmenistanyň Mejlisiniň Maglumatlary, 2006 ý., № 4, 22-nji madda)

Türkmenistanyň Garaşsyzlygynyň ilkinji günlerinden başlap, Türkmenistanyň ilkinji we ömürlik Prezidenti, Türkmenistanyň Milli Olimpiýa hereketiniň we Milli Olimpiýa Komitetiniň başlygy Beýik Saparmyrat Türkmenbaşy türkmen sportuny we milli olimpiýa hereketini ösdürmäge uly üns berdi.

Türkmenistanyň Garaşsyzlygynyň 15 ýylynyň içinde Beýik Serdarymyz sport pudagyna uly möçberlerde maýa goýumlaryny gönükdirip, halkara ülňülerine laýyk gelýän täze sport binalaryny, stadionlary, buzly köşgi, Köpetdagyň eteginde uzynlygy 36 kilometrden hem geçýän "Serdaryň saglyk ýoluny", sport toplumlaryny we beýleki döwrebap desgalary gurup, halkymyza peşgeş berdi.

Häzirki wagtda Beýik Serdarymyzyň hut özüniň gönüden-göni görkezmesi boýunça gurlan, halkara ülňülerine doly laýyk gelýän Olimpiýa suw-sport toplumy diňe bir Garaşsyz, baky Bitarap Türkmenistanda däl, eýsem, sebitde we dünýäde suwda oýnalýan sport oýunlarynyň ýakyn geljekde barha ösdürilmegine ýardam berer.

Türkmenistanyň Prezidenti Beýik Saparmyrat Türkmenbaşynyň türkmen halkynyň saglygyny goramakda, sagdyn bedenli, ruhubelent nesli kemala getirmekde alyp barýan ýadawsyz işlerini aýratyn bellemek bilen hem-de sport ulgamynyň işgärleriniň haýyşlaryny we Türkmenistanyň Syýahatçylyk we sport baradaky döwlet komitetiniň ýüztutmasyny nazara alyp, Türkmenistanyň Mejlisi karar edýär:

Aşgabat şäherinde gurlan Olimpiýa suw-sport toplumyna "Türkmenbaşynyň Olimpiýa suw-sport toplumy" adyny dakmaly we ony "Türkmenbaşynyň Olimpiýa suw-sport toplumy" diýip atlandyrmaly.

Türkmenistanyň Mejlisiniň Başlygy Ö. Ataýew

Aşgabat şäheri

2006-njy ýylyň Sanjar aýynyň 21-i

№ 66-III