1941-1945-nji ýyllaryň Beýik Watançylyk urşunda gazanylan Beýik Ýeňşiň 63 ýyllygy mynasybetli sowgatlary gowşurmak hakynda

TÜRKMENISTANYŇ PREZIDENTINIŇ

P E R M A N Y

1941-1945-nji ýyllaryň Beýik Watançylyk urşunda gazanylan Beýik Ýeňşiň 63 ýyllygy mynasybetli sowgatlary gowşurmak hakynda

(Türkmenistanyň Prezidentiniň namalarynyň we Türkmenistanyň Hökümetiniň çözgütleriniň ýygyndysy 2008 ý., № 5, 348-nji madda)

1941-1945-nji ýyllaryň Beýik Watançylyk urşuna gatnaşyjylaryň söweşlerde görkezen deňsiz-taýsyz gahrymançylygyny hem-de watan gerçekleriniň mukaddes ojagyny saklap oturan ýalňyz naçarlaryň, ak saçly enelerimiziň görkezen nusgalyk edermenligini hormatlap, olaryň ýaş nesillerimizi watançylyk, gahrymançylyk, mertlik ruhunda terbiýelemekde, halkymyzyň agzybirligini, jebisligini berkitmekde alyp barýan asylly işlerini, ýurdumyzda amala aşyrylýan özgertmeleri üstünlikli durmuşa geçirmäge goşýan goşantlaryny göz öňünde tutup, şeýle hem Beýik Ýeňşiň 63 ýyllygy mynasybetli, karar edýärin:

1. Welaýatlaryň, şäherleriň we etraplaryň häkimlikleri, Türkmenistanyň Uruş weteranlarynyň Türkmenistanyň Gahrymany Atamyrat Nyýazow adyndaky guramasynyň merkezi geňeşi 1941-1945-nji ýyllaryň Beýik Watançylyk urşunyň 63 ýyllygy mynasybetli oňa gatnaşyjylaryň, şeýle hem Beýik Watançylyk urşy ýyllarynda frontda wepat bolan esgerleriň ýanýoldaşlarynyň her birine Türkmenistanyň Prezidentiniň adyndan 1 mln. manat möçberde pul sowgadyny hem-de telewizor we radio sowgatlaryny gowşurmaly.

2. Türkmenistanyň Söwda we daşary ykdysady aragatnaşyklar ministrligi gowşuryljak telewizorlar we radiolar bilen býujetdäki sarp edijiler üçin bellenen nyrhlardan üpjün etmeli.

3. Welaýatlaryň, şäherleriň we etraplaryň häkimlikleri 1941-1945-nji ýyllaryň Beýik Watançylyk urşuna gatnaşyjylara saglyk hyzmatlarynyň ilkinji nobatda edilmegini, olaryň her biriniň durmuş-ýaşaýyş şertlerini gowulandyrmak boýunça çärelerini geçirilmegini üpjün etmeli we bu meseläni hemişelik üns merkezinde saklamaly.

4. Türkmenistanyň Maliýe ministrligi şu Permanyň 1-nji bölüminde görkezilen sowgatlary Türkmenistanyň Döwlet býujetiniň hasabyna maliýeleşdirmeli.

5. Şu Permanyň ýerine ýetirilişine Türkmenistanyň Ministrler Kabinetiniň Başlygynyň Orunbasarlary H. Saparlyýew, H. Geldimyradow. H. Muhammedow, Türkmenistanyň Prezidentiniň Diwanynyň Iş Dolandyryjysy Ý. Işangulyýew, Türkmenistanyň Ýokary gözegçilik edarasynyň başlygy T. Japarow, welaýatlaryň, şäherleriň we etraplaryň häkimleri gözegçilik etmeli.

Türkmenistanyň Prezidenti

Gurbanguly Berdimuhammedow

Aşgabat ş.

2008-nji ýylyň 2-nji maýy

№ PP-5085