«Türkmenistanyň halk atşynasy» diýen hormatly ady dakmak hakynda

TÜRKMENISTANYŇ PREZIDENTINIŇ

P E R M A N Y

010.200.050

«Türkmenistanyň halk atşynasy» diýen hormatly

ady dakmak hakynda

(Türkmenistanyň Prezidentiniň namalarynyň we Türkmenistanyň Hökümetiniň çözgütleriniň ýygyndysy, 2017-nji ýyl, № 4-5, 176-njy madda)

Berkarar döwletimiziň bagtyýarlyk döwründe Garaşsyz, baky Bitarap Watanymyzy hemmetaraplaýyn ösdürmekde öňde duran belent wezipeleri durmuşa geçirmekde ykdysadyýetimiziň ähli pudaklarynda uly üstünlikler gazanylýar. Mähriban halkymyzyň çekýän agzybirlikli we tutanýerli zähmeti netijesinde, eziz Diýarymyz bedew bady bilen ösüşleriň täze belentliklerine tarap ynamly one barýar. Ata Watanymyzda amala aşyrylýan beýik işler bilen bir hatarda, atçylyk pudagyny ösdürmek, behişdi bedewlerimiziň tohum arassalygyny gorap saklamak, syna owadanlygyny kämilleşdirmek we baş sanyny artdyrmak, halkymyzyň genji-hazynasyna öwrülen türkmen bedewleriniň şan-şöhratyny has-da belende götermek, bu ugurda daşary ýurt döwletleri bilen hyzmatdaşlygy giňeltmek, şeýle hem atçylyk pudagy üçin ýokary derejeli hünärmenleri, ussat atşynaslary, seýisleri we çapyksuwarlary taýýarlamak boýunça giň gerimli işler alnyp barylýar. Ýurdumyzda döwrebap atçylyk sport toplumlary, athanalar we atçylyk sporty boýunça okuw merkezleri gurlup, ulanmaga berilýär.

Türkmenistanyň Garaşsyzlyk ýyllarynda türkmen halkynyň mulli buýsanjy, gözelligiň ajaýyp nusgasy bolan behişdi bedewleriniň dünýädäki at-abraýyny has-da belende götermekde, olaryň şan-şöhratyny dünýä ýaýmakda we seýisçilik sungatyny ösdürmekde bitiren uly hyzmatlary üçin, türkmen bedewlerini seýislemäge we olaryň syn-sypatyny kämilleşdirmäge, atçylyk pudagyny, şol sanda atçylyk sportuny ösdürmäge aýratyn şahsy goşant goşandyklaryny, at çapmagyň we bedewleri seýislemegiň inçe tälimleriniň nusgalyk usullaryny ýaş nesle öwretmekde uly işleri bitirendiklerini we ýokary netijeleri gazanandyklaryny nazara alyp, şeýle hem Türkmen bedewiniň baýramy mynasybetli, karar edýärin:

Ýurdumyzyň şu raýatlaryna «Türkmenistanyň halk atşynasy» diýen hormatly ady dakmaly:

«Türkmen atlary» döwlet birleşiginiň Halkara ahalteke atçylyk sport toplumynyň atçylyk bölüminiň seýsi Ilmyrat Agamyradowa,

«Türkmen atlary» döwlet birleşiginiň Türkmenistanyň Prezidentiniň ahalteke atçylyk toplumynyň seýisçilik bölüminiň baş seýsi Kakamyrat Agamyradowa,

«Türkmen atlary» döwlet birleşiginiň Halkara ahalteke atçylyk sport toplumynyň atçylyk bölüminiň seýsi Baýramgeldi Hydyrowa,

«Türkmen atlary» döwlet birleşiginiň Halkara ahalteke atçylyk sport toplumynyň atçylyk bölüminiň seýsi Orazguly Babalyýewe,

«Türkmen atlary» döwlet birleşiginiň Türkmenistanyň Prezidentiniň ahalteke atçylyk toplumynyň seýisçilik bölüminiň seýsi Mälikmyrat Durdyýewiç Muhammedowa.

Türkmenistanyň Prezidenti

Gurbanguly Berdimuhamedow

Aşgabat şäheri.

2017-nji ýylyň 27-nji apreli.

№ PP-94