Hakyky harby gullugyň bellenilen möhletlerini gulluk edýän harby gullukçylary Türkmenistanyň territoriýasynda ýerleşýän Ýaragly Güýçlerden, serhet goşunlaryndan we içerki goşunlardan zapasa goýbermek hem-de Türkmenistanyň graždanlaryny harby we alternatiw (zähmet) gulluga nobatdaky çagyryş hakynda

TÜRKMENISTANYŇ PREZIDENTINIŇ

P E R M A N Y

Hakyky harby gullugyň bellenilen möhletlerini gulluk edýän harby gullukçylary Türkmenistanyň territoriýasynda ýerleşýän Ýaragly Güýçlerden, serhet goşunlaryndan we içerki goşunlardan zapasa goýbermek hem-de Türkmenistanyň graždanlaryny harby we alternatiw (zähmet) gulluga nobatdaky çagyryş hakynda

(Türkmenistanyň Prezidentiniň aktlarynyň we Türkmenistanyň Hökümetiniň kararlarynyň ýygyndysy 1993 ý., № 10, 1560-njy madda)

Türkmenistanyň Konstitusiýasynyň 57-nji maddasynyň 3-nji punktuna laýyklykda, karar edýärin:

1. Hakyky harby gullugyň bellenilen möhletlerini gulluk eden möhletli gullukdaky harby gullukçylary 1993-nji ýylyň oktýabrynda-dekabrynda Türkmenistanyň territoriýasynda ýerleşen Ýaragly Güýçlerden, serhet goşunlaryndan we içerki goşunlardan zapasa goýbermeli.

2. Çagyryş gününe çenli 18 ýaşy dolýan, çagyryş möhletiniň soňa goýulmagy üçin hukugy bolmadyk Türkmenistanyň erkek graždanlaryny, şeýle hem çagyryş möhletini soňa goýmak hukugyny ýitiren uly ýaşly graždanlary 1993-nji ýylyň oktýabrynda-dekabrynda harby we alternatiw (zähmet) gulluga çagyrmaly.

3. Etraplaryň, şäherleriň çagyryş komissiýalarynyň işine ýolbaşçylyk etmek hem-de olaryň işine kontrollyk etmek üçin welaýat çagyryş komissiýalaryny döretmegi welaýatlaryň häkimliklerine tabşyrmaly.

4. Çagyryş komissiýalarynyň agzalarynyň, çagyrmaga degişli graždanlara medisina taýdan güwä geçmek üçin ýokary hünärli wraçlaryň - spesialistleriň we orta medisina personalynyň oňat hilli seçilip alynmagyny etraplaryň, şäherleriň harby komissarlyklary we saglygy saklaýyş organlary bilen bilelikde üpjün etmegi etraplaryň hem-de şäherleriň häkimliklerine tabşyrmaly.

5. Ýerli ýerine ýetiriji häkimiýet organlaryna graždanlaryň çagyrylmagyny guramak üçin şu aşakdakylary tabşyrmaly:

harby komissarlyklara enjamlaşdyrylan territoriýalary we otaglary bermegi;

zerur bolan medikamentleriň, medisina enjamlarynyň, öwseleleriň, hojalyk emläginiň we transportyň berilmegini üpjün ztmegi;

harby komissarlygyň çagyrmalary hakynda graždanlara kärhanalaryň, edaralaryň we guramalaryň ýolbaşçylary bilen bilelikde kabar etmegi, çagyryşy we goşuna ugradyşy geçirmek üçin olaryň guramaçylykly gelmegini üpjün etmek barada çäreler görmegi;

çagyryşdan boýun towlaýan graždanlary içeri işler organlarynyň üsti bilen gözlemegi, kanuny esaslar bar mahalynda bolsa olary saklamagy;

gulluga çagyrylýanlaryň zähmetkeşler kollektiwleri, ene-atalar, uruş we zähmet weteranlary tarapyndan sargyt edilip, dabaraly ugradylmagyny guramagy;

graždanlaryň harby gullugy geçmek üçin iberilen goşun bölümleri bilen şeflik gatnaşyklaryny ýola goýmagy hem-de saklamagy;

harby komissarlyklaryň ýüz tutmagy boýunça welaýatlaryň we Aşgabat şäheriniň ýygnanyş punktlarynda bufetleri we naharhanalary, alkogolsyz içgileriň, azyk harytlarynyň, ilkinji zerur harytlaryň satylmagyny guramagy.

6. Harby gatnaw organlary bilen bilelikde gulluga çagyrylýanlaryň komandalarynyň plana laýyklykda bökdençsiz gatnadylmagyny, şeýle hem gatnadyş dokumentleriniň harby komissarlyklaryň ýüz tutmagy boýunça alynmagyny we resmileşdirilmegini, transport münmegi we onuň ugradylmagyny guramagy üpjün etmegi Türkmenistan Döwlet demir ýoluna tabşyrmaly.

7. Hakyky harby gulluga nobatdaky çagyryşdan boýun towlaýan adamlary jogapkärçilige çekmek boýunça Türkmenistanyň jenaýat kanunlaryna laýyklykda wagtynda çäreler görüp durmagy Türkmenistanyň prokuratura organlaryna tabşyrmaly.

8. Şu Permanyň ýerine ýetirilişine kontrollyk etmegi Türkmenistanyň Içeri işler ministriniň, Turkmenistanyň Saglygy saklaýyş ministriniň, Türkmenistanyň Goranmak ministriniň, Türkmenistanyň Döwlet demir ýolunyň naçalniginiň üstüne ýüklemeli.

9. Şu Perman çap edilen pursatyndan başlap güýje girýär.

Türkmenistanyň Prezidenti Saparmyrat Türkmenbaşy

Aşgabat şäheri

1993-nji ýylyň 5-nji oktýabry

№ PP-1009