Ahal welaýatynyň Aşgabat etrabynyň adyny üýtgedip, oňa Ruhabat adyny dakmak hakynda

TÜRKMENISTANYŇ PREZIDENTINIŇ

P E R M A N Y

Ahal welaýatynyň Aşgabat etrabynyň adyny üýtgedip,

oňa Ruhabat adyny dakmak hakynda

(Türkmenistanyň Prezidentiniň namalarynyň we Türkmenistanyň Hökümetiniň çözgütleriniň ýygyndysy, 2001 ý., №10, 472-nji madda)

Baky bitarap Türkmenistan döwletimiziň mähriban halky şu günler ykdysady we ruhy galkynyşy başdan geçirýär. Beýik Garaşsyzlygymyzyň 10 ýylynyň içinde ýurdumyzda geçirilen çuňňur we giň göwrümli ykdysady özgertmelerimiziň netijesinde durmuşyň ähli ugurlarynda ýeten ýokary sepgitlerimiz, azat, erkana, abadan ýaşaýyşyň üpjün edilmegi, Birleşen Milletler Guramasyna girýän dünýäniň 185 döwleti tarapyndan Türkmenistanyň bitarap döwlet diýlip resmi taýdan ykrar edilmegi we bitirilen ençeme guwandyryjy ägirt uly işler özbaşdaklygymyzyň 10 ýyllyk toýunyň baýramçylyk, ýürekjoşduryjy, tolgundyryjy duýgulary bilen birleşýär.

Taryha nazar salsak, gahryman türkmen halkymyz adyny dünýä taryhyna hut özüniň ruhy galkynyş zamanasynda ýazypdyr. Türkmen halkynyň guran onlarça döwletleri gülläp ösüpdir. Türkmen ylmy, medeniýeti we sungaty tutuş adamzat nesliniň ösmegine täsir edipdir. Türkmen sähralary bagy-bossanlyga bürenip, dünýäniň iň datly nygmatlary ösdürilip ýetişdirilipdir. Iň gymmatly we hümmetli, hasyllylygy ýokary bolan «ak bugdaýyň» tohumy şu topraklarda döredilipdir we dünýä ýaýrapdyr.

Uzak ýyllaryň dowamynda türkmen halky öz döwletliligini ýitirdi we baknalykda ýaşady. Şöhratly taryhyny, aslyny, dilini, dinini, medeniýetini we sungatyny ýitirip başlady. Bu ruhy taýdan çökgünliligiň netijesinde şeýle boldy.

Agzybir türkmen halkymyzyň öz garaşsyzlygyna eýe bolmagy bilen onuň taryhynda täze bir eýýam başlandy. Bary-ýogy on ýylyň içinde bitarap Türkmenistan dünýäniň iň ösen döwletleriniň arasyna goşuldy. Watandaşlarymyz gül ýaly, azat, erkana durmuşda ýaşap, ata Watanymyzyň ösmeginiň hatyrasyna joşgun bilen zähmet çekýär. Baky bitarap Türkmenistanyň her bir raýaty düýnüne, şu gününe, öz nesilleriniň altyn geljegine berk ynanýar.

Beýik Garaşsyzlygymyzyň on ýylynyň içinde mähriban türkmen halkymyz özüniň ruhy gymmatlyklarynyň ählisine eýe boldy. Ata- babalarymyzyň milli däpleriniň täzeden dikeldilmegi, eziz halkymyzyň öz ene dilini, dinini, şöhratly taryhyna eýe bolmagy, täze milli baýramçylyklarymyzyň döredilmegi, obalarymyza, etraplarymyza, şäherlerimize taryhy atlarynyň gaýtaryp berilmegi ýa-da döwrebap atlaryň dakylmagy onuň ruhuçökgünlikden baknalykdan saplanyp, ruhunyň täzelenip, milli galkynyşa gelmegine has-da itergi berdi. Gahryman türkmen halkymyzyň ölmez-ýitmez milli we ruhy gymmatlyklaryny öz içine alýan RUHNAMA kitabymyz bolsa ALTYN ASYRYMYZDA ruhy galkynyşymyzyň belentden belent bolup müňýyllyklara dowam etmegi üçin ak ýol açar.

Mähriban türkmen halkymyzyň ruhy galkynyşa täzeden eýe bolmagynyň, şol ruhy galkynyşy netijesinde özüniň altyn asyryna gadam basmagynyň şanyna, il-günümiziň ruhlarynyň mydama belent, abat bolup müňýyllyklara uzap gitmegi üçin, Köpetdag eteklerinde oba hojalygyny düýpli ösdürip, taryhy şöhratyna eýe etmek, güneşli ülkämiziň ýer-ýurt atlaryny döwrebaplaşdyrmak maksady bilen hem-de watandaşlarymyzyň arzuw-isleglerini we haýyşlaryny göz öňüne tutup, karar edýärin:

1. Ahal welaýatynyň Aşgabat etrabynyň adyny üýtgedip, oňa Ruhabat adyny dakmaly we mundan beýläk ony Ahal welaýatynyň Ruhabat etraby diýip atlandyrmaly.

2. Ahal welaýatynyň Aşgabat etrabynyň merkezi Öwezberdi Kulyýew adyndaky şäherçäniň adyny üýtgedip, oňa Ruhabat adyny dakmaly we mundan beýläk ony Ahal welaýatynyň Ruhabat şäherçesi diýip atlandyrmaly.

3. Ahal welaýatynyň Ruhabat şäherçesini Ahal welaýatynyň Ruhabat etrabynyň merkezi diýip bellemeli.

Türkmenistanyň Prezidenti Saparmyrat Türkmenbaşy

Aşgabat ş.

2001-nji ýylyň 6-njy oktýabry

№ PP-3468