Uzen (Gazagystan) - Gyzylgaýa-Bereket-Etrek (Türkmenistan) - Gorgan (Eýran) halkara demir ýolunyň Türkmenistanyň çäklerindäki böleginiň gurluşygy hakynda

TÜRKMENISTANYŇ PREZIDENTINIŇ

P E R M A N Y

Uzen (Gazagystan) - Gyzylgaýa-Bereket-Etrek (Türkmenistan) -

Gorgan (Eýran) halkara demir ýolunyň Türkmenistanyň

çäklerindäki böleginiň gurluşygy hakynda

(Türkmenistanyň Prezidentiniň namalarynyň we Türkmenistanyň Hökümetiniň çözgütleriniň ýygyndysy, 2007 ý., № 12, 857-nji madda)

Berkarar Türkmenistan döwletimiz Garaşsyzlygyna eýe bolandan soň, ykdysadyýetimizi düýpgöter özgertmekde uly sepgitlere ýetildi. Ýurdumyzyň ykdysadyýetini we beýleki pudaklaryny üýtgedip guramakda we olaryň gurluşyny döwrüň talaplaryna laýyk kämilleşdirmekde düýpli işler edildi. Ýurdumyzyň we gonşy döwletleriň ykdysadyýetiniň ösmegi üçin uly itergi beren Tejen-Sarahs-Maşat, Türkmenabat-Atamyrat, Aşgabat-Garagum-Daşoguz demir ýollarynyň gurluşygynyň öz güýçlerimiz bilen üstünlikli tamamlanmagy ýurdumyzyň ykdysady taýdan kuwwatlydygynyň aýdyn subutnamasydyr. Bu ýollaryň işe girizilmegi ýurdumyzyň ykdysady kuwwatyny has-da berkitmäge, goňşy döwletleri bilen gatnaşyklary ösdürmäge uly mümkinçilikleri döretdi. Türkmenistanyň goňşy döwletler bilen haryt dolanyşygy ýylsaýyn artýar.

Dünýä ýurtlaryny we olaryň halklaryny has ysnyşdyrmak, olar bilen hoşniýetli gatnaşyklary ösdürmek we Ýewropa bilen Aziýa yklymyny täzeden birleşdirmek, Gyzylgaýanyň gymmatly tebigy baýlyklaryny, şeýle hem ýurdumyzyň polat ýoluň ugrundaky beýleki künjekleriniň mümkinçiliklerini halkymyzyň eşretli ýaşamagy üçin özleşdirmek, päk ýürekli ynsanlarymyzyň tutanýerli zähmetini siňdirip, uzak ýyllar bäri adam gudratyna, yhlasyna, idegine garaşyp ýatan ymgyr çöli gülzarlyga öwürmek, täze demir ýoluň ugrunda gözel şäherçeleri we obalary döretmek, halkymyzy täze iş ýerleri bilen üpjün etmek maksady bilen, karar edýärin:

1. 2007-nji ýylyň Bitaraplyk aýynyň 1-inden Uzen-Gyzylgaýa-Bereket-Etrek-Gorgan halkara demir ýolunyň Türkmenistanyň çäklerindäki uzynlygy 697,5 km bolan böleginiň gurluşygyna başlamaly we ony ähli kömekçi desgalary bilen bilelikde 2011-nji ýylyň Bitaraplyk aýynda ulanmaga bermeli.

2. Türkmenistanyň üstünden geçýän Uzen-Gyzylgaýa-Bereket-Etrek-Gorgan halkara demir ýolunyň gurluşygyny Türkmenistan üçin ileri tutulýan möhüm syýasy we ykdysady ähmiýetli gurluşyk diýip kesgitlemeli.

3. Türkmenistanyň Demir ýol ulaglary ministrligine Uzen-Gyzylgaýa-Bereket-Etrek-Gorgan halkara demir ýolunyň Türkmenistanyň çäklerindäki böleginiň gurluşygy boýunça buýrujy we baş potratçy bolup çykyş etmäge hem-de gurluşygy amala aşyrýarka ýerli we daşary ýurtly potratçylary çekmäge ygtyýar bermeli.

4. Türkmenistanyň Oba hojalyk ministrliginiň ýanyndaky Ýer serişdeleri gullugy Balkan welaýatynyň häkimligi bilen bilelikde Uzen-Gyzylgaýa-Bereket-Etrek-Gorgan halkara demir ýolunyň Türkmenistanyň çäklerindäki bölegini gurmak üçin ýer bermek boýunça namalary Türkmenistanyň Demir ýol ulaglary ministrligi bilen şertnama boýunça tölegsiz resmileşdirmeli.

5. Şu Permanyň ýerine ýetirilişine Türkmenistanyň Ministrler Kabinetiniň Başlygynyň Omnbasarlary R.Meredow, G.Aşyrow, N.Şagulyýew, T.Tagyýew, H.Muhammedow, Türkmenistanyň Demir ýol ulaglary ministri D.Muhammetgulyýew, Balkan welaýatynyň häkimi O.Nyýazlyýew we Türkmenistanyň Ýokary gözegçilik edarasynyň başlygy T.Japarow gözegçilik etmeli.

Türkmenistanyň Prezidenti

Gurbanguly Berdimuhammedow

Aşgabat ş.

2007-nji ýylyň 1-nji dekabry

№ PP-4947