Türkmenistanda bilim işgärleriniň iş haklarynyň we talyp haklarynyň möçberlerini köpeltmek hakynda

TÜRKMENISTANYŇ PREZIDENTINIŇ

P E R M A N Y

Türkmenistanda bilim işgärleriniň iş haklarynyň we talyp haklarynyň möçberlerini köpeltmek hakynda

050.100.010

130.010.030

(Türkmenistanyň Prezidentiniň namalarynyň we Türkmenistanyň Hökümetiniň çözgütleriniň ýygyndysy, 2007 ý., № 3, 198-nji madda)

Üçünji muňýyllygy özüniň Altyn asyryna öwren baky Bitarap Türkmenistan döwletimiz, agzybir, parahatçylyk söýýän we oňa uly hormat goýýan türkmen halkymyz syýasy, ykdysady we medeni ugurlarda uly üstünliklere eýe boldy. Türkmenistanyň Ilkinji Prezidenti Beýik Saparmyrat Türkmenbaşynyň parasatly ýolbaşçylygynda berkarar edilen Türkmenistan Diýarymyzy indi dünýä tanaýar. Beýik Serdarymyzyň röwşen paýhasynyň miwesi, türkmen halkynyň ruhy şamçyragyna öwrülen Mukaddes Ruhnama ýolumyza nur çaýýar. Röwşen geljegimiziň girewi bolan ýaşlary ata-babalarymyzyň asyrlar boýy sünnäläp kemala getiren, Mukaddes Ruhnamada çuňňur watançylyk ruhunda beýan edilen durmuş-ýaşaýyş ýol-ýörelgeleriniň, taglymlarynyň, edep kanunlarynyň esasynda terbiýelemek bilim işgärleriniň mukaddes borjudyr. Eziz ýaşlarymyzyň ýokary derejede bilim-sowat almaklaryny, hünär edinmeklerini gazanmak, olary ylma-bilime höweslendirmek, halallyk, ahlaklylyk, agzibirlik, beýik watançylyk ruhunda terbiýelemek ýurdumyzda alnyp barylýan ähli özgertmelerimiziň özenidir.

Garaşsyz, baky Bitarap Türkmenistan Watanymyzy mundan beýläk-de ösdürmek, bilim ulgamyny düýpli özgertmek we kämilleşdirmek, ýaşlara berilýän bilim-terbiýäniň dünýä bilim derejesine laýyk bolmagyny gazanmak, mugallymlary ösüp gelýän nesillerimiziň bilim-terbiýe işine has-da höweslendirmek, olaryň ýaşaýyş-durmuş, iş şertlerini gowulandyrmak, ýaşlarymyza bilim-sowat, edep-terbiýe bermekde jemgyýetde tutýan ornuna mynasyp baha bermek, şeýle hem talyp ýaşlarymyzyň ylym-bilim almaga işjeň gatnaşmaklaryny gazanmak maksady bilen karar edýärin:

1. 2007-nji ýylyň 1-nji sentýabryndan professor-mugallymlaryň tarif möçberlerini we iş haklaryny, şeýle hem talyplaryň we okuwçylaryň talyp haklary "Bilim-terbiýeçilik edaralarynyň işini kämilleşdirmek hakynda" Türkmenistanyň Prezidentiniň 2007-nji ýylyň 4-nji martynda çykaran 8365-nji kararynda bellenilen mugallymçylyk ýüküne gaýtadan hasaplamagy göz öňünde tutmak bilen 40 göterim köpeltmeli.

2. Türkmenistanyň Ykdysadyýet we maliýe ministrligi 2007-nji ýyl üçin Türkmenistanyň döwlet býujetine şu karardan gelip çykýan üýtgetmeleri girizmeli.

3. Türkmenistanyň Adalat ministrligi şu karardan gelip çykýan üýtgetmeler Türkmenistanyň kadalaşdyryjy hukuk namalaryna girizmek boýunça teklipler taýýarlamaly we Türkmenistanyň Ministrler Kabinetiniň garamagyna hödürlemeli.

4. Şu kararyň ýerine ýetirilişine Türkmenistanyň Ministrler Kabinetiniň Başlygynyň Orunbasarlary, welaýatlaryň we Aşgabat şäheriniň häkimleri gözegçilk etmeli.

Türkmenistanyň Prezidenti

Gurbanguly Berdimuhammedow

Aşgabat ş.

2007-nji ýylyň 30-njy marty

№ PP-4722