Türkmenistanyň Ýaragly Güýçlerinde, Serhet goşunlarynda we Içerki goşunlarynda, hukuk goraýjy organlarynda düzgün-nyzamy we tertibi pugtalandyrmak hakynda

TÜRKMENISTANYŇ PREZIDENTINIŇ

P E R M A N Y

Türkmenistanyň Ýaragly Güýçlerinde, Serhet goşunlarynda we Içerki goşunlarynda, hukuk goraýjy organlarynda düzgün-nyzamy we tertibi pugtalandyrmak hakynda

(Türkmenistanyň Prezidentiniň aktlarynyň we Türkmenistanyň Hökümetiniň kararlarynyň ýygyndysy, 1996 ý., № 6, 5014-nji madda)

Garaşsyz milli döwletiň ösdürilmegi, giň möçberli demokratik täzeleniş, ykdysady özgerişlikleriň üstünlikli amala aşyrylmagy, bitarap Türkmenistanyň halkara abraýynyň pugtalandyrylmagy döwletiň konstitusion esaslarynyň yzygiderli durmuşa geçirilmegidir. Olaryň mizemezligi Ýaragly Güýçler, Serhet goşunlary we Içerki goşunlar, içeri işler, milli howpsuzlyk, prokuratura organlary we sudlar tarapyndan üpjün edilýär. Ýokarda görkezilen gurluşlaryň ýurduň goranmak ukybyny pugtalandyrmaga, onuň serhetleriniň eldegrilmesizligini üpjün etmäge, hukuk tertibini we kanunylygy saklamaga goşýan goşandynyň we bu ugurdaky işiniň oňyn netijeleriniň bardygyny ykrar etmek bilen, harby gullukçylaryň we hukuk goraýjy organlaryň işgärleriniň düzgün-nyzamy bozmagy, hünär we gulluk borjuny äsgermezligi, gulluk ýagdaýyny hyýanatçylykly peýdalanmagy, parahorlyga, korrupsiýa baş goşmagy, ok atýan ýaragy, tehnikany we emlägi ogurlamagy ýaly ýagdaýlara ýol berilmeli däldigini nygtamak zerurdyr.

Düzgün-nyzamyň we jogapkärçiligiň derejesini ýokarlandyrmak, harby bölümleriň ýokary söweşjeň ukybyny üpjün etmek, goşunyň we hukuk goraýjy organlaryň abraýyny pugtalandyrmak, kanunlaryň bozulmagynyň, hyýanatçylyklaryň we beýleki hukuk bozulmalarynyň, şeýle hem gulluk gatnaşyklarynda ildeşe arka ýapmak halatlarynyň doly soňuna çykmak maksady bilen, karar edýärin:

1. Türkmenistanyň Goranmak ministri, Türkmenistanyň Içeri işler ministri, Türkmenistanyň Milli howpsuzlyk komitetiniň başlygy, Türkmenistanyň Serhet goşunlarynyň komanduýuşisi, Türkmenistanyň Baş prokurory, Türkmenistanyň Ýokary sudunyň başlygy:

harby adamyň we hukuk goraýjynyň abraýyna ysnat getirýän hukuk bozulmalarynyň edilmegi, parahorluk we tanyşparazlyk, harby komissarlyklaryň işgärleriniň graždanlary Türkmenistanyň milli goşunyna, beýleki goşunlaryna harby gulluga çagyrylmagyndan bikanun boşatmagy üçin jenaýat jogapkärçiligine çekmelidir, harby atlardan, beýleki atlardan we derejelerden mahrum etmelidir, şeýle hem ulanylýan kanunlarda harby gullukçylar we hukuk goraýjy organlaryň işgärleri üçin göz öňünde tutulan maddy we beýleki ýeňilliklerden hem-de artykmaçlyklardan mahrum etmelidir. Harby atlardan, beýleki atlardan we derejelerden mahrum etmegi öz ygtyýarlyklarynyň çäklerinde amala aşyrmalydyr, beýleki halatlarda degişli teklipleri Türkmenistanyň Hökümetine 3 gün möhletde girizmelidir;

goşunlarda we hukuk goraýjy organlaryň düzgün-nyzamy we tertibi pugtalandyrmak boýunça çäreleriň kompleksini, şol sanda olary durmuşa geçirmegiň we kontrollygyň usullaryny bir hepde möhletde işläp taýýarlamalydyr we Türkmenistanyň Ministrler Kabineti bilen ylalaşyp tassyklamalydyr;

harby gullukçylar we hukuk goraýjy organlaryň işgärleri tarapyndan edilen ähli hukuk bozulmalaryna wagtynda we hemmetaraplaýyn garamagy, şol halatlar boýunça gulluk derňewiniň geçirilmeginiň we ulanylýan kanunlara laýyklykda degişli çäreleriň görülmegini üpjün etmelidir;

Türkmenistanyň Ýaragly Güýçlerine, Serhet goşunlaryna we Içerki goşunlaryna hem-de hukuk goraýjy organlaryna işgärleri seçip almak, olary ýerbe-ýer goýmak we terbiýelemek işiniň talaba laýyk derejede bolmagyny üpjün etmelidir. Tanyşlyk, tire-taýpa aragatnaşyklyklary we ildeşlik esasynda gulluga almagyň halatlarynyň soňuna çykmalydyr.

2. Özlerine ynanylan organlarda we bölümlerde düzgün-nyzamyň tertibiň we ahlak ýagdaýynyň üpjün edilmegi üçin şahsy jogapkärçiligi Türkmenistanyň Ýaragly Güýçleriniň, Türkmenistanyň Serhet goşunlarynyň we Içerki goşunlarynyň, hukuk goraýjy organlarynyň ähli derejelerdäki ýolbaşçylarynyň we komandirleriniň üstüne ýüklemeli.

3. Türkmenistanyň Ýustisiýa ministrligi ulanylýan kanunlary şu Perman bilen baglanyşyklylykda kämilleşdirmek boýunça teklipleri dahylly ministrlikler hem-de wedomstwolar bilen bilelikde bir aý möhletde taýýarlamalydyr hem-de Türkmenistanyň Ministrler Kabinetine girizmelidir.

Türkmenistanyň Prezidenti Saparmyrat Türkmenbaşy

Aşgabat şäheri

1996-njy ýylyň 24-nji iýuny

№ PP-1835