2025-nji «Halkara parahatçylyk we ynanyşmak ýylyny» geçirmek boýunça çäreler hakynda
TÜRKMENISTANYŇ PREZIDENTINIŇ
P E R M A N Y
2025-nji «Halkara parahatçylyk we ynanyşmak ýylyny» geçirmek boýunça çäreler hakynda
(Türkmenistanyň Prezidentiniň namalarynyň we Türkmenistanyň Hökümetiniň çözgütleriniň ýygyndysy, 2024 ý., № 8-9, 807-nji madda)
2024-nji ýylyň 24-nji sentýabrynda Aşgabat şäherinde geçirilen Türkmenistanyň Halk Maslahatynyň mejlisinde beýan edilen Türkmenistanyň hemişelik Bitaraplygynyň 30 ýyllyk baýramçylygynyň we 2025-nji «Halkara parahatçylyk we ynanyşmak ýylynyň» ähmiýetli aýratynlyklaryndan we bu babatda kesgitlenen wezipelerden ugur alyp, Türkmenistanyň halkara syýasy giňişligiň ygtybarly agzasy hökmünde açyk, parahatsöýüji, oňyn we aýdyň daşary syýasaty alyp barýandygyny, sebit we halkara derejesinde netijeli hyzmatdaşlygy ösdürmekde, parahatçylygy we howpsuzlygy berkitmekde dünýäde uly orun eýeleýändigini, özüniň Bitaraplyk ýörelgesine ygrarly bolmak arkaly halkara gatnaşyklarynyň parahatçylykly ýol bilen ösdürilmegine, ählumumy howpsuzlygyň we durnukly ösüşiň üpjün edilmegine uly goşant goşýandygyny, Birleşen Milletler Guramasynyň Parahatçylyk medeniýeti babatda Jarnamasynyň we Hereketleriniň maksatnamasynyň ähmiýetini nazara alyp, Ýer ýüzüniň köp döwletleri, abraýly halkara guramalary bilen dostlukly, birek-birege ynanyşmak we deňhukukly hyzmatdaşlyk ýörelgelerine esaslanýan gatnaşyklary saklaýandygyny göz öňünde tutup, şeýle hem döwletimiziň başlangyjy bilen Birleşen Milletler Guramasynyň Baş Assambleýasynyň kararnamasy esasynda 2025-nji ýylyň «Halkara parahatçylyk we ynanyşmak ýyly» diýlip yglan edilmegi mynasybetli göz öňünde tutulýan dabaralary we çäreleri ýokary derejede guramaçylykly geçirmek maksady bilen, karar edýärin:
1. Türkmenistanyň Mejlisi, Türkmenistanyň Ministrler Kabineti, Türkmenistanyň ministrlikleri we pudaklaýyn dolandyryş edaralary, Türkmenistanyň syýasy partiýalary we jemgyýetçilik guramalary 2025-nji «Halkara parahatçylyk we ynanyşmak ýylyny» geçirmek bilen bagly dabaralaryň we çäreleriň ýokary derejede we guramaçylykly geçirilmegini üpjün etmeli.
2. 2025-nji «Halkara parahatçylyk we ynanyşmak ýyly» mynasybetli geçiriljek dabaralary we çäreleri ýokary derejede geçirmek boýunça Guramaçylyk döwlet toparyny döretmeli we onuň düzümini tassyklamaly (goşulýar).
3. Türkmenistanyň Mejlisi 2025-nji «Halkara parahatçylyk we ynanyşmak ýylynyň» dowamynda Türkmenistanyň parahatçylyk we ynanyşmak ýörelgelerine daýanýan daşary syýasatynyň hukuk esaslaryny berkitmek maksady bilen, degişli kadalaşdyryjy-hukuk namalaryny işläp taýýarlamak meselelerine bellenilen tertipde seretmeli.
4. Türkmenistanyň Ministrler Kabineti 2025-nji «Halkara parahatçylyk we ynanyşmak ýyly» mynasybetli dabaralary we çäreleri ýokary derejede geçirmek boýunça guramaçylyk, hukuk we maliýe meseleleri bilen bagly çözgütleriň taýýarlanmagyny, kabul edilmegini, ýerine ýetirilmegini we gözegçilikde saklanmagyny üpjün etmeli.
5. Türkmenistanyň Daşary işler ministrligi 2025-nji «Halkara parahatçylyk we ynanyşmak ýyly» mynasybetli Birleşen Milletler Guramasy we beýleki halkara guramalary bilen ysnyşykly hyzmatdaşlyk edip, 2025-nji ýylyň dowamynda halkara derejesindäki çäreleriň toplumyny durmuşa geçirmek boýunça zerur işleri amala aşyrmaly.
6. Şu Permanyň ýerine ýetirilişine Türkmenistanyň Mejlisiniň başlygy, Türkmenistanyň Ministrler Kabinetiniň Başlygynyň Orunbasarlary, Türkmenistanyň Prezidentiniň Diwanynyň we Türkmenistanyň Ministrler Kabinetiniň Iş Dolandyryjysy gözegçilik etmeli.
Türkmenistanyň Prezidenti
Serdar Berdimuhamedow
Aşgabat şäheri.
2024-nji ýylyň 24-nji sentýabry.
№ PP-447
Türkmenistanyň Prezidentiniň
2024-nji ýylyň 24-nji sentýabrynda
çykaran PP-447-nji Permany bilen
tassyklandy
2025-nji «Halkara parahatçylyk we ynanyşmak ýyly» mynasybetli geçiriljek dabaralary we çäreleri ýokary derejede geçirmek boýunça Guramaçylyk döwlet toparynyň
DÜZÜMI
Serdar Berdimuhamedow - Türkmenistanyň Prezidenti (Guramaçylyk döwlet toparynyň başlygy)
Türkmenistanyň Mejlisiniň Başlygy
Türkmenistanyň Ministrler Kabinetiniň Başlygynyň Orunbasary, Türkmenistanyň Daşary işler ministri
Türkmenistanyň Ministrler Kabinetiniň Başlygynyň ylym, bilim, saglygy goraýyş, sport, ýaşlar we jemgyýetçilik meseleleri boýunça Orunbasary
Türkmenistanyň Ministrler Kabinetiniň Başlygynyň medeniýet meseleleri boýunça Orunbasary
Türkmenistanyň Ministrler Kabinetiniň Başlygynyň ykdysady, bank we halkara maliýe guramalary meseleleri boýunça Orunbasary
Türkmenistanyň Ministrler Kabinetiniň ýanyndaky Ulag we kommunikasiýalar agentliginiň Baş direktory
Türkmenistanyň Bilim ministri
Türkmenistanyň Saglygy goraýyş we derman senagaty ministri
Türkmenistanyň Maliýe we ykdysadyýet ministri
Türkmenistanyň Söwda we daşary ykdysady aragatnaşyklar ministri
Türkmenistanyň Medeniýet ministri
Türkmenistanyň Goranmak ministri, Türkmenistanyň Döwlet howpsuzlyk geňeşiniň Sekretary
Türkmenistanyň Içeri işler ministri
Türkmenistanyň Baş prokurory
Türkmenistanyň Ýokary kazyýetiniň başlygy
Türkmenistanyň Milli howpsuzlyk ministri
Türkmenistanyň Döwlet serhet gullugynyň başlygy
Türkmenistanyň Adalat ministri
Türkmenistanyň Merkezi bankynyň başlygy
Türkmenistanyň Döwlet migrasiýa gullugynyň başlygy
Türkmenistanyň Döwlet gümrük gullugynyň başlygy
Türkmenistanyň Telewideniýe, radiogepleşikler we kinematografiýa baradaky döwlet komitetiniň başlygy
Türkmen döwlet neşirýat gullugynyň başlygy
Türkmenistanyň Döwlet habarlar agentliginiň başlygy
Türkmenistanyň Ministrler Kabinetiniň ýanyndaky Ulag we kommunikasiýalar agentliginiň «Türkmenhowaýollary» agentliginiň başlygy
Türkmenistanyň Ministrler Kabinetiniň ýanyndaky Ulag we kommunikasiýalar agentliginiň «Türkmenaragatnaşyk» agentliginiň başlygy
Türkmenistanyň Ministrler Kabinetiniň ýanyndaky Ulag we kommunikasiýalar agentliginiň «Türkmenawtoulaglary» agentliginiň başlygy
Welaýatlaryň, Aşgabat we Arkadag şäherleriniň häkimleri
Türkmenistanyň syýasy partiýalarynyň we jemgyýetçilik guramalarynyň başlyklary
Türkmenistanyň Senagatçylar we telekeçiler birleşmesiniň Müdiriýetiniň başlygy
Türkmenistanyň Söwda-senagat edarasynyň başlygy